මාතෘත්වය පිළිබද, ලාංකීය ගීත සාහිත්‍යය තුළ, බොහෝ ගීත ලියැවී ඇත. මාතෘත්වය යනු, උත්තරීතර පදවියකි. අම්මා කෙනෙකු දරුවන් වෙනුවෙන්, අසීමිත කැපකිරීම් සිදු කරයි. රජ මැදුරක ජීවත් වුවත්, කුඩා පැල්පතක ජීවත් වුවත්, අම්මා යනු, අමිල වස්තුවකි. එකී මාතෘත්වය පිළිබද, ප්‍රේම කීර්ති ද අල්විස් ශුරීන් පද රචනය කළ, වී. හේමපාල පෙරේරා ශුරීන්ගේ සංගීතයෙන් හැඩ වූ, සුජාතා අත්තනායක නම් ගායන ශිල්පිනියගේ ලයාන්විත හඬ පෞරුෂය මත ගැයෙන, මෙකී අපූර්ව ගීතය ඔබ අසා තිබේද?
"දුනුකෙයියා මලක් වගේ දුරට පේනවා
වැටකෙයියා මලක් වගේ සුවඳ හමනවා
පසළොස්වක සඳ වාගේ එළිය ගෙනෙනවා
මගේ අම්මා මට ජීවන සුවය සදනවා"
ඔබ කුසට පැමිණි දා සිට, ආදරණීය අම්මා, ඔබ වෙනුවෙන් දහසකුත් ප්‍රාර්ථනා පොදි බදියි. ඒ වගේම, ඔබ මෙලොවට බිහි වුන දවසේ සිට, මේ වන තෙක්, (ඔබ කොපමණ වයසක පසුවන අයෙක් වුවත්) ඔබේ අම්මා, තවමත් ඔබව අත් නොහැර ඔබේ සුඛ විහරණය ම, ප්‍රාර්ථනා කරයි. නමුත් වර්තමානයේ බොහෝ දරුවන්ට, අම්මගේ ආදරය, සෙනෙහස අමතකව ගිය අවස්ථා ඕනෑ තරම් දෘශ්‍යමාන වේ. කිසිදු දවසක, අම්මා ඔබව, අතහැර නොගියා නම්, ඔබේ සුරක්ෂිතතාවය වෙනුවෙන් කැපවූවා නම්, එකී මාතෘත්වය වෙනුවෙන්, ඔබ යුතුකම් ඉටු කළ යුතු නොවේද? ඔබේ ජීවිතයේ සුවය නිර්මාණය කළේ, ඔබේ අම්මා බව ඔබ අමතක කළ යුතු නැත. ඔබේ ජීවිතය අඳුරට යාමට ඉඩ නොදී, ඔබේ ජිවන ගමන එළි පෙහෙළි කළ අම්මාට, ඔබ කෘතඥපූර්වක විය යුතු නොවේද?
"සංසාරෙන් සංසාරෙට එකට ආ බැඳී
කෙනෙක් නොමැත දරුවෙක් හට මවක් සේ ලැදී
අම්මා යන සමාධියට සිටිමි සම වැදී
ඔබෙ ගුණ කීමට හෝඩියේ අකුරු මට මදී"
අම්මා, තමන්ගේ දරුවන්ගේ සුඛ විහරණයම ප්‍රාර්ථනා කරයි. දරුවෙක්ගේ දුකක් අභිමුව මවක් හදවතින්ම හඬා වැටෙයි. එසේම, දරුවෙක්ගේ ජයග්‍රහණ දැක, මවක් හදවතින්ම සතුටු වෙයි. අම්මා කෙනෙකු තරම් දරුවෙක්ට සමීප තවත් අයෙක් සිටියිද? ඔව්, තාත්තාත් අම්මා සේම, දරුවන්ගේ යහපත ප්‍රාර්ථනා කරයි. එහෙත්, නිරන්තරයෙන් දරුවන් අසළ රැදී හිඳ, අසීමිත දරු ස්නේහය වපුරවන්නේ, ආදරණීය අම්මාය. නමුත්, නිරන්තයෙන් ළග නොසිටියත්, තාත්තාගේ ආදරණීය ආශීර්වාදය ඔබ කෙරෙහි ඇති බව අමතක නොකළ යුතුය.
ඔබ අද නගරයක ජීවත් වන්නට පුළුවන. ඒ වගේම අම්මා ගමෙහි සිට ඔබ එනතුරු බලා සිටිනවා විය හැක. ඔබ අනේක වීඳ ගැටළු සිත්හි තබා ගෙන නගරයෙන්, ගම වෙත පියමං කළ දිනෙක, මවගේ රුව දුටු වනම හිතට දැනෙන සහනය, සැනසිල්ල, ඔබට වචනයට නැගිය හැකිද?
ඔබ අද නගරයක ජීවත් වන්නට පුළුවන. ඒ වගේම අම්මා ගමෙහි සිට ඔබ එනතුරු බලා සිටිනවා විය හැක. ඔබ අනේක වීඳ ගැටළු සිත්හි තබා ගෙන නගරයෙන්, ගම වෙත පියමං කළ දිනෙක, මවගේ රුව දුටු වනම හිතට දැනෙන සහනය, සැනසිල්ල, ඔබට වචනයට නැගිය හැකිද?
"සිවු බුදුවරු දුටු ලෙස එක දින එක පිම්මේ
ඔබ දුටුවම මගෙ දුක් ගිනි නිවෙනවා අම්මේ
සක්විති රජවරුනගෙ දන ඔබ ළග නැම්මේ
සිරිමහ බෝ මුල මතු දින බුදු වෙනු අම්මේ "
මහා භද්‍ර කල්පයක් තුළ, පහළ වන්නේ, බුදුවරු පස් නමක් පමණි. මෙකී භද්‍ර කල්පය තුළ, දැනට පහළව ඇත්තේ, ගෞතම බුදුන්, කකුසඳ බුදුන්, කෝණාගම බුදුන් හා කාශ්‍යප බුදුන් වේ. එම බුදුන් වහන්සේලා, සිවු බුදුවරු ලෙස, අර්ථ ගැන්වේ. මහා භද්‍ර කල්පයක් තුළ හමුවන, සිවු බුදුවරු එක දිනෙක දැකිය හැකිනම්, එය කෙතරම් සැනසිලිදායක මොහොතක්ද? අම්මා දැකීම, එවැනි භක්ති වන්දනීය මොහොතක් ලෙස දැක්වීම කෙතරම් අර්ථපූර්ණ නොවන්නේද? ඔබ මොනයම් නිළතල දරන්නෙක් වුවද, අම්මාගේ දෙපා වන්දනීය වන්නේ ඒ නිසාමයි.
දරුවන් වෙනුවෙන් අසීමිත ස්නේහය පතුරුවන, ආදරණීය ඔබ, සිරිමහ බෝ මුල මතු දින බුදු වෙනු අම්මේ!!! එය සියලු දරුවන්ගේ ප්‍රාර්ථනාවයි.
අයි.ඒ. සචිනි නිමල්කා
දරුවන් වෙනුවෙන් අසීමිත ස්නේහය පතුරුවන, ආදරණීය ඔබ, සිරිමහ බෝ මුල මතු දින බුදු වෙනු අම්මේ!!! එය සියලු දරුවන්ගේ ප්‍රාර්ථනාවයි.
අයි.ඒ. සචිනි නිමල්කා
